- +1
保质期
原创 孔曦 海上梦叠
来源:新民晚报
原创:孔曦
沪语改写:边秦翌
讲述:朱友好
审阅、推荐:丁迪蒙
编辑:王乙其
上趟仔阿拉小区改造自来水管,生活做好个辰光,我送拨勒工人一大瓶呒没开过封个果粒橙,想表示表示感谢。过脱仔一歇,迭个工人拿仔果粒橙回来了,讲:“阿姨,搿瓶饮料过期了。”哦哟,我一记头邪气尴尬,立时三刻仔细看看叫保质期,真个呶,半个号头之前就过期了。
从小,大人就表扬我,讲我一点也“勿馋”,长大之后难板吃吃零食、吃吃饮料,对伊拉个保质期,是从来也呒没关心过。“退货”个事体发生之后,再要拿吃个物事送拨人家,我侪要仔仔细细个看看保质期。屋里个存货,也提醒自家快点吃脱。
除脱食品,有保质期个物事还有交关。譬如:药品、家化用品、颜料,还有丝绸咾啥。我邪气欢喜丝绸搭仔纯羊毛个衣裳。但是姆妈讲,丝绸勿好传代个。就是因为丝绸里向含蛋白质,假使保存勿当,会得腐坏生虫。纯羊毛个衣裳也是一样个。
物质个物事有得保质期,精神层面个物事呢,也有得保质期个。譬如友情、爱情、亲情、知识技能搭仔观念。再深厚个友谊,假使常庄沉浸于“想当初阿拉哪能哪能要好”,从来勿关心对方当下个痛痒,搿能介个友情,总归会得冷谈个。再热烈个爱情,假使只晓得索取,或者一味个迁就,辰光长了,也会得冷却个。还有亲情,也是要用真心换真心个,任何个欺骗、利用搭仔防备,勒勒岁月搿本账浪向,侪会得拨扣脱利息搭仔本金。
讲得俗气点,勒社会浪,人与人之间,所有好吃个、好看个、好白相个物事,侪应该好好叫珍惜、回报。呒没任何人是天经地义一定要关爱啥人或者是青睐啥人个。
有道是“施恩勿念,受恩莫忘”,道德只好搭自家提要求,勿可以用来苛求其他人。明白了迭个道理,其他人一点点个善意搭仔帮助,我侪会得及时讲一声“谢谢侬”。有些勿言谢个大恩,更加是要深深个铭记于心,但凡有得机缘,一定要涌泉相报。
老早就读到过,友情、爱情要用心经营。因为我个书生气,当时辰光还觉着经营个讲法邪气虚伪。等到自家阅历多了,见识了理想搭仔现实之间个落差,再明白迭个道理。
并勿是讲,世界浪一切个美好侪是要用美好来交换个,而是晓得了,夫妻之间也有勿恩爱个,父子之间也有勿慈孝个,朋友之间也有勿真诚个……假使讲,有幸碰到美好个人或者事,应当邪气珍惜。用真心搭仔真情,用善意搭仔善举,竭尽所能,勿断个为之充值,为之续命。日日复月月,月月复年年,延长伊个保质期。
吃个物事临到保质期了,应该快点吃脱;感情出现问题了,要想办法挽回弥补;知识搭仔技能落伍了,要尽快学习提高,覅让自家变成功“老科学个家”;观念陈旧了,更加要注意常庄自省更新,就像电脑操作系统,当然勿可以一成勿变咾。还有顶顶要紧个是,最根本个良知搭仔逻辑,是一切思想搭行为个基础,理应坚如磐石,保质到永远。
作者:孔曦
讲述:朱友好
——————————————————
丁迪蒙
迪蒙,启迪蒙昧者也。上海市人。原上海大学中文系教师,多年来一直致力于沪语和海派文化的传承。
沪语是吴方言的代表方言,是吴侬软语的典范。她既可以用来拉家常,也同样可以用来朗读各类诗歌散文。
沪语完全可以书写,同粤语可以写作是一样的。本平台所有文章都是经过改写后,用沪语来演绎的,汉字书写也是正确的。
丁迪蒙所撰写的,与沪语相关的著作主要有:
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》,少年儿童出版社
《囡囡学成语》,少年儿童出版社
原标题:《保质期》
本文为澎湃号作者或机构在澎湃新闻上传并发布,仅代表该作者或机构观点,不代表澎湃新闻的观点或立场,澎湃新闻仅提供信息发布平台。申请澎湃号请用电脑访问http://renzheng.thepaper.cn。
扫码下载澎湃新闻客户端
Android版
iPhone版
iPad版
- 澎湃新闻微博
- 澎湃新闻公众号
- 澎湃新闻抖音号
- IP SHANGHAI
- SIXTH TONE
- 报料热线: 021-962866
- 报料邮箱: news@thepaper.cn
沪ICP备14003370号
沪公网安备31010602000299号
互联网新闻信息服务许可证:31120170006
增值电信业务经营许可证:沪B2-2017116
© 2014-2024 上海东方报业有限公司